2021 թ. հունվարի 18-ին, ՀՀ Շրջակա միջավայրի նախարար Ռոմանոս Պետրոսյանը գրությամբ դիմել է բնապահպանական ոլորտի միջազգային կազմակերպություններին՝ նրանց ուշադրությունը հրավիրելով Ադրբեջանի կողմից պատերազմի ընթացքում Արցախի ժողովրդի դեմ կիրառված միջազգայնորեն արգելված թունավոր զինամթերքի ծանր հետևանքների մասին։

Ադրբեջանական ագրեսիան չի սահմանափակվել միայն Արցախով, այլ տարածվել է մինչև Հայաստանի Հանրապետության տարածք։ Այսպիսով՝ ներկայումս Հայաստանը կանգնած է բնապահպանական լուրջ վտանգների առջև, մասնավորապես․

• Անտառածածկ տարածքների կորուստ, անտառի դեգրադացիա և անտառային հրդեհների ռիսկերի մեծացում: Հրդեհները կանխամտածված կերպով վնաս են հասցրել «Արծվաբերդ» և «Սյունիք» անտառային տնտեսություններին:

• Ջրի, սանիտարական մաքրման, թափոնների ենթակառուցվածքների կորուստ կամ խափանում, պոչամբարներ և այլն:

• Լանդշաֆտներին, գեոբազմազանությանը և կենսաբազմազանությանն ուղղված ֆիզիկական վնաս:

• Հսկայական քանակությամբ բեկորներ և փլատակներ, որոնք կարող են օդի և հողի աղտոտում առաջացնել և այլն:

ՀՀ Շրջակա միջավայրի նախարարությունը և նախարար Ռոմանոս Պետրոսյանը կոչ են անում միջազգային հանրությանը՝ ակտիվորեն ներգրավվել և օժանդակել Հայաստանում շրջակա միջավայրի վնասի մանրակրկիտ գնահատմանը և մեղմել սահմանային տարածքում ստեղծված կրիտիկական իրավիճակը։

Գրությունն ուղարկվել է՝

• Հայաստանում ՄԱԿ-ի մշտական համակարգողին,

• Ռամսարի կոնվենցիայի գլխավոր քարտուղարին,

• Կենսաբազմազանության մասին կոնվենցիայի գործադիր քարտուղարին,

• «Միգրացվող վայրի կենդանիների տեսակների պահպանության մասին» կոնվենցիայի «Աֆրո-Եվրասիական միգրացվող ջրային թռչունների պահպանության մասին» (AEWA) համաձայնագրի գործադիր քարտուղարին,

• Վայրի կենդանիների միգրացվող տեսակների պահպանման մասին կոնվենցիայի գործադիր քարտուղարին,

• Բեռնի կոնվենցիայի գլխավոր քարտուղարին,

• ՄԱԿ-ի բնապահպանական ծրագրերի գործադիր տնօրենին,

• Բնության պահպանության միջազգային միության գլխավոր տնօրենին,

• Եվրոպական հանձնաժողովի գործադիր փոխնախագահ, «Եվրոպական կանաչ գործարք»-ի համար պատասխանատու հանձնակատարին,

• Շրջակա միջավայրի, օվկիանոսների և ձկնորսության հարցերով հանձնակատարին:

Աղբյուրը՝ ՀՀ Շրջակա միջավայրի նախարարության ֆեյսբուքյան էջ: